Павлодарда республикалық үстел теннисі Федерациясының көшпелі кеңесі өтті, онда федерация президенті Данияр Әбілғазин, вице-президент Елсияр Қанағатов, бас хатшы Данил Пак, Павлодар облысы федерациясының президенті Асхат Қалиев, ҚР Ұлттық құрамасының бас жаттықтырушысы Эльмира Әлиева, сондай-ақ өңірлік федерациялардың басшылары мен Қазақстан құрамасының жаттықтырушылар штабы аталған аймақта үстел теннисін дамытудың мәселелерін талқылады.

Павлодар облысында болу бағдарламасы толыққанды болды. Сонымен қатар, делегация Тереңкөл ауылында стационарлық үстел теннисі залына және БЖСМ спортшыларының жаттығу барысына барды.

Күннің екінші жартысында іс-шаралар "Jenimpaz" үстел теннисі орталығында өтті, онда Павлодар облысының дене тәрбиесі және спортты дамыту басқармасының басшысы Даур Ерғабұлов барлық қатысушыларды орталықтың техникалық сипаттамаларымен егжей-тегжейлі таныстырды.

"Jenimpaz" кәсіби клубының директоры Дәулет Ысқақов көшпелі кеңеске қатысушыларға клубтың қызметі туралы егжей-тегжейлі айтып берді: жаттықтырушы-кеңесшіні шақыру, спортшыларды жарыстар мен оқу-жаттығу жиындарына іссапарға жіберу, спорттық мүкәммал, құрал-жабдықтарды сатып алу, жалақы төлеуге шарттар жасасу, спортшыларды республикалық және халықаралық жарыстарға дайындау.

Павлодар облысының төрешілер корпусының істері туралы спорт төрешісі Сұлтан Темірғалиев баяндады.

Аталған іс-шараның үшінші және маңызды оқиғасы жалпы кеңес болды, онда республикалық федерацияның басшысы Данияр Әбілғазин Павлодар облысының алға жылжығанын және өңірдегі үстел теннисін дамытуда үлгі болып табылатынын атап өтті.

"Бүгін біз облыстық федерацияның жақсы және жүйелі жұмысының спортты дамытуда өз жемісін беретініне куә болдық. Мұнда негізгі спорт орталығынан басқа үстел теннисі клубы, балалар мен жасөспірімдер спорт мектептерінде, сондай-ақ облыстың барлық аудан орталықтарында бөлімшелер жұмыс істейді. Төрешілер алқасы құрылған. Павлодар қазірдің өзінде көптеген республикалық старттарды өткізудің дәстүрлі орнына айналды. Спортты дамытудың осындай көпвекторлы саясаты - өте маңызды және бұл еліміздің барлық облыстық федерацияларының басшылары ұмтылуы тиіс нәрсе. Осы кеңестен кейін өңірлік федерациялардың әрбір өкілі өз ұйымының жұмысын талдап, проблемалық мәселелер мен оларды шешудің мүмкін жолдарын анықтауы тиіс деп санаймын. Аудан орталықтарында және облыстық спорт интернаттарында үстел теннисінің көбірек бөлімшелерін ашу қажет. Басымдық әрдайым бұқаралылыққа және шұғылданушылардың сапалы дайындығы үшін жағдай жасауға, сондай-ақ теннисшілердің жақсы резервін қалыптастыруға бағытталуы керек. Бұл қажырлы тәсіл мен бірлесіп әрекет етуді қажет ететін ауқымды жұмыс. Сондықтан, республикалық федерация проблемалық аймақтарды жоюға және облыс орталықтарында жаңа жағдайлар жасауға көмектесу үшін әр облысқа баруға дайын", - деді ҚР ҮТФ президенті Данияр Әбілғазин.

Федерацияның вице-президенті Елсияр Қанағатов өңірлердегі жұмысқа кешенді тәсіл қажеттігі туралы айтты:

"Еліміздегі спорттың жаһандық дамуы туралы айтатын болсақ, жұмыс облыс орталықтары мен балалар және жасөспірімдер спорт мектептерінен басталатынын ескеру әрқашан маңызды. Қол жетімді үстел теннисі секциялары мен клубтарының болуы әр аймақта қалыпты жағдайға айналуы керек. Сондықтан біз жұмыстың ағымдағы жай-күйін және облыстық федерациялардың проблемалық мәселелерін бақылауға алуды жоспарлап отырмыз. ҚР ҮТФ басшысының тапсырмасы бойынша биыл мен дамыту жағдайларын қалыптастыру, жергілікті әкімдіктермен және спорт басқармаларымен келіссөздер жүргізу, сондай-ақ үстел теннисін дамыту саласындағы ынтымақтастық туралы меморандумдар жасасу үшін еліміздің өңірлеріне жұмыс сапарымен барамын".

Сондай-ақ, кеңес барысында Павлодар облысында үстел теннисін дамыту тәжірибесі туралы жергілікті Федерация президентінен, сондай-ақ Қазақстан ұлттық құрамасының бас жаттықтырушысынан ҚР өңірлеріндегі спортшыларды даярлау, әлем чемпионатына дайындық барысы туралы есептері тыңдалды.

"Қазіргі уақытта ұлттық құраманың спортшылары Алматыда өтіп жатқан оқу-жаттығу жиынында - 2023 жылғы әлем чемпионатына дайындалуда. Бұл Олимпиадаға дейінгі маусымда өте маңызды бастама, сондықтан күн сайын физикалық жүктемелерден басқа, спортшылармен дұрыс көңіл-күйге жету үшін психологиялық жұмыс жүргізіледі. Қазіргі уақытта ұлттық құраманың көшбасшылары жақсы спорттық күйде, олардың әрқайсысының жеке тактикасы бар. Біз оларды бағыттауға және қолда бар базаны жақсартуға тырысамыз, - дейді еліміздің ұлттық құрамасының бас жаттықтырушысы Эльмира Әлиева - сондай-ақ, барлығымызға облыстардағы жас таланттарды іздеуге және қолдауға көбірек көңіл бөлу керек екенін айтқым келеді. Спортшының деңгейін тұрақты көтеру үшін мемлекеттік көмектен басқа, жергілікті федерацияның үнемі қолдауы да қажет. Болашақта Қазақстанның әлемдік жетістіктерін көру үшін үстел теннисінің жас дарындарын қазір анықтау қажет. Өйткені, біздің спорт түрі -бұл тактика мен еңбекке қабілеттілік қана емес, сонымен қатар спортшының бастапқы таланты".

Көшпелі кеңесті қорытындылай келе, ҚР ҮТФ басшысы үстел теннисін әлеуметтік желілер мен медиа-жарнаманың барлық құралдарын қолдана отырып, заманмен қатар жүріп дамыту қажет екенін атап өтті. Сондай-ақ барлық қатысушыларға қажетті жұмыс нәтижелеріне жету жолында сәттілік пен табыс тіледі.